Geschichte in Plattdeutsch

Wenn dree Daag de Klöönkasten nich geiht

Lött sik denn ohn "Handy" överhaupt noch leven?
Annalena harr ehrn Hinnerk, wat ehrn Mann is, seggt, dat se Josef, de de Swiegervadder vun ehrn Söhn is, to sien Geboortsdag mit den Klöönkasten graleern müssen, denn se harr dit Johr keen Geboortsdagkoort schickt. Doch wat schallen Annalena un Hinnerk bloot maken, wenn an Josef sien Ehrendag an den 31.12. de Sabbelkasten just nich geiht. De "Telekom" noch dorto seggt, dat se an den Schaden, de al dree Daag duurte, iewerig arbeiten deen. Do Hinnerk un Annalena to de poor letzten Minschen hören doot, de keen "Handy" un ok keen Klöönkastenkoort hebbt, müssen de beiden nu loosgahn, um in een Klöönkastenzell ehr Glück to versöken. As de beiden an de neegste Sabbelkastenzell kernen, weer dat Klock twee un weer to froh, um antoropen, denn um düsse Tiet wöörn Josef mit sien Fru Emmy seker ehrn Meddagslaap hollen. So güngen Annalena un Hinnerk wieder, um dat bi de neegste Klöönkastenzell an't Raathuus to versöken. Doch dor geev dat bloot dat Besett Teken ut den Hörer. De beiden, de so geern Josef graleern wullen, güngen eenmal um dat Raathuus un versuchten dorna noch maal ehr Glück. Bloot Besett Teken kunn man hören. In de Twüschentiet geev Annalena ehrn Hinnerk mehmaals to verstahn, dat so een "Handy" doch wat Wunnerbores weer, wat man jo ok grootoorig bi't Autofohren bruken kunn. Annalena wull ok nich begriepen, dat de "Telekom" al den drütten Dag den Schaden noch nich repa reert harr, Wat schulten bloot de Lüüd maken, de echt in Noot weern? Dorbi snackte Annalena vun Fruuns, de just in de Tiet ehr Kind kriegen schullen. Do seggte Hinnerk, de äs een Gemöötsminsch gellen deit bloot: "Denk doch maal an Maria un Joseph in Bethlehem, de in de .Hillige Nacht' ok keen Klöönkasten un ok keen ,Handy' harrn. Oder denk an dien egen Modder! Wo büst du boorn worrn ohn düsse Segen vun de Technik, ohn den wi vundaag nich mehr leven köönt oder wüllt." Dat weer wohrhaftig keen Water op Annalena's Möhlen un se seggte: "Du büst even keen Minsch, de modern is! Man müss bi de ,Telekom' luut hals protesteern! Düssen Schandaal schull man sik doch eenfach nich gefallen laten!" "Dat do man", weer de Anter, de Hinnerk noch seggen kunn. In de Twüschentiet weern de beiden bi de Post ankamen un versöchten dor dat Anropen. Doch de doren Anrop"Automaten" wullen dat Geld nich annehmen. Weren de villicht al op "EURO" umstellt worrn, dat weer jo de 31.12. Annalena un Hinnerk weern raatloos, wo se ehre Wünsche to den Geboortsdag vun Josef looswarrn schullen. So güngen de beiden in de Rieht na Huus. Dorbi kernen se an de Klöönkastenzell in de Neegde vun ehr Wahnung, wo se vorher an vörbi gähn weern, wieldat noch to froh weer, un makten ehrn letzten Versöök. Un wat se al nich mehr to glöven sik truten, dat worr doch noch wohrhaftig, de Ansluß klappte. Hinnerk un sien Annalena kunnen Josef in Monster hartlich graleern. He hett sik ok düchtig freut. He geev aver to verstohn, dat man em an den Dag lang nich anropen kunn, wo he an den Morgen den Hörer vun sien Klöönkasten nich richtig op de Gavel leggt harr. Doröber müssen Annalena un Hinnerk bloot düchtig lachen. Ok noch dörum, dat ehr Sabbelkasten wedder güng, äs se wedder an't Huus kernen, un den Hörer afnehmen deen. In de Zeitung vun den 3. 1. kunn man denn lesen, dat rund 1000 Huusholte un Bedrieven in de Stadt in ehre Sabbelkastens keen Saft harrn. Water harr de Leitung twei maakt. Dat Repareern vun den Schaden hett denn vun Friedag bit Mondag Avend Klock söben duurt. Dormit kunnen aver de goden Wünsche för dat "Nie Johr 2002" mit de Klöönkastens wedder in alle Welt schickt warrn.

Helmut Riemer