Geschichte in Plattdeutsch

De Düwel schitt immer up den gröttsten Hucken

Ick häbbe en niet Gesetz entdeckt. Oder is et gar nich sau nie? Et gaht hier nich um en Gesetz wie, datte nix klauen dröffst oder datte nich owerall parken kannst, nee, ick meine en Naturgesetz wie taun Bispeel: allet fallt nah unnen, oder: warme Luft stiggt nah boben.
Biste all mal up ner Landstrate efeuhert mit dienen Wagen, vor dick de Strate is leddig, wiet un siet kein Auto? Nah ner Tied siehste: ganz wiet weg is da en Trecker vor dick oder en Radfahrer. Du kummst näger un wutt ne owerhalen, aber dat geiht nich, denn jetze is da mit'n Mal en Auto, dat dick entgegen kummt, un just da, wo de Trecker oder de Radfahrer is, da drepet ji jück. Du moßt up de Bremse pedden, den annern vorbilaten, un erst denne kannste dat langsame Gerät owerhalen. De einzige Wagen, de dick entgegenkummt, un dat einzige Vehikel, dat vor dick up diener Sur feuhert, aber da, wo de owerhalen wutt, da drepet ji alle dreie tehope.
Oder kiek up dienen Kalenner. Ower Wochen haste da nix stahn, keine Geburtsdagsinladunge, kein Theater oder Konzert, keine Fier, nix. Aber haste mal en Termin festemaket un hast de Inladunge von Tante Mienchen annenohmen, denne kannste sicher sien, dat da for den sülbigen Fag noch twei, drei annere Termine taukomet, de alle wichtig sind, aber du kannst ja bloß nah den einen hengahn.
Oder dien Telefon is kaputt. Denne is dat wisse sau, dat ook noch dat Klo sau verstoppt is, dat de Klempner komen mott, dat de Waschmaschine in'n Dutten is, dat Radio sienen Geist uppegeben hat un dat de Wind en paar Tegels von dienen Dake efeget hat.
Dat si dat Gesetz, dat ick rutefunnen häbbe. Ick will et mal dat Huckengesetz näumen, weil: allet kummt uppen Mal, uppen Hucken. Mit'n Gelle is et ja ook sau. Veele Lüe hätt nix, aber denne gifft et wecke, da sitt dat Geld uppen Hucken, dat se nich wett, wohen damidde. Wo wat is, da kummt noch wat tau. Dat ole Sprickwort stimmet immer noch: de Düwel schitt immer up den gröttsten Hucken. Dat is eben dat Huckengesetz.

Jürgen Schierer, Peine